لاپ دوزگون آغلاماغا یازمیرام نئجه کی بونا مین دؤنه آغلامیشام و ائله کی گؤزوم سو دان دا دوشوب و ایندیجه یالنیز بو سؤزو یازیرام آمما نه ائدیم باشلامادان قاباق گؤزوم سووو آخیر انشاءالله یازا بیله م

قره آغاج بیزیم کندلره ساری گئده نده ایلکی کند ظولم آباد آدلانیر و سورا آخساخلار و آراز گونئی لری و بو کندلرین آراسی دئمه ک بوتون دوزدور و کولک قار اولاندا اوردا باش چیخارتماق چوخ چتین دیر و هله-هله یول تاپیلماز و ایندییه جک نئچه نفرلر بو دوزلرده اؤلوب و یا بیر تلل-فللینه ن اؤزلرین قوتاریبلار و لاپ سونو دؤرد ایل بوندان قاباق بیر آنا و ایگید اوغلو یازین 15 اینده اوردا کوله گه دوشوب سحره جاق قار ایچینده بیر کوهول کیمین ده قالمیشدیلار و افسوسلار آنا اؤلموشدو. و اوغول آتین گوجونه اؤزون قوتارمیشدی و منیم آتام آنام دا بیر آتین گوجونه اوتوز ایل بوندان قاباق بوردان جان قوتارمیشدیلار آمما منیم سؤزؤم بولار دگیل، بیلمیره م کندیده اوچو اوخویوردوم یا دؤردو، آنجاق بیر گون یازین ییرمی بئش اوتوزوندا خبر گلدی طالب لی احد آقانین سرباز اوغلو اؤلوبدو و حاجی عمی گلسین ناماز قیلمه گه به نه اولوبدو نجور نییه؟

ائیواز او ایل سرباز یازیلمیشدی یای دان 18 گئده ن گئدیردی آمما ائله او گونلره جاق آتاسینا کؤمک ائله مک اوچون داوارا گئدیب اوت دریب و آتاسینین ایشلرین نن بیر چوخون گؤروب سربازلیغا یوللاندی "آموزشی" تبریزه دوشموشدو یایین اون یئتدی سی کندیده ن آتا-آناسین و باجی سین و کیچیک قارداشین اؤپوب تراکتورا مینیب قره آغاجا ساری یوللاندی باجی آغلار آنا آغلار و آتا توتقون آتا کند آدامی دیر ایندیه جاق قره آغاجدان ایراق گئدمه میشدی و آتا بو اوزاغلیغی ایچینه آتدی.

آموزش قوتولاندان سورا ائیواز بیر اون گونه کنده قاییتدی و بو دؤنه او گره ک کوردستانا گئدئیدی اونا گؤره ائوده دئدی من گئدیره م انشاءالله بایرام دا گله م ائله اوندا یاخچی دیر قیش گونو گله نمه ره م کندین زادین یولو یوخدور باجی سی آناسی دئدی لر اوندا گله نده بیر قوتو شیرنی ده آل گتیر آتان کی شهره گئده ن دگیل...

سربازیمیز گئتدی نه گئتدی، پاییزین اوزون گونلری توز-تورپاغلی یئلینه ن بیر بیر ایل کئچیردی یازیق احد آقانین ائوی سووو سووولموش دگیرمانا اوخشاییردی و ایه م کیچیک اوغلو غلامحیدر اولماسایدی اورا بیله سینه لاپ دارغین اولاردی گینه او گزه نی دی ائله اؤز باشین اوردا بوردا قاتیردی چوخو کؤیشه نه گئده ردی. آمما یازیق آناسی و باجی سی داریخمادان آز قالیردی باغریلاری قان اولا. ارلیک باجی گودوردو قارداش گله ائلچی سینه هن جاوابی وئره لر. قیش باشلادی احد آقانین دا داوارینین دؤلو دوشدو، اولار سئوینیردیلر بو ایل گینه یاخچی اولدو بیر نئچه قوزولاری واردی آخی بیر ایکی ایلیدی قویون آلمیشدیلار و غلامحیدر سئوینجه ک "داداشیمنان بو ایل قوزو داغلاییب چیخارداق"

بؤیوک چیلله نئچه گون قالمیشدی ائیوازین "فرماندهی" دئدی بو ایل بایرامدا "مرخص لیک" یوخدور کیمسه ایسته ییر ایندی گئدسین، ائیواز چوخ آغیر-یونگول ائده نده سورا دئدی:" نییه نه اولوب بیر جور بو اوتوز کیلومتر یول گئدیب کنده چاتانمایاجام، یوکوم یوخ بوش بیر آدام اویانایا-اوینایا بو کندیده ن او کنده گئده رم هر یئرده گؤرسم قار یاغیر کندی لرین بیرینده قاللام"

آنا آتاسین و باجی قارداشین گؤرمه ک هاواسی اونو لاپ اؤدگه له ندیردی گئدیب مرخصلیک آلدی و بیر اوتوبوسونان اؤزون قره چیمه نه یئتیریب اورداندا قره آغاجا گلدی. ناهاردان سورا ساعت اوچ زاد اولاردی قره آغاجا یئتیشدی هاوا دن دن قار تؤکوردو چوخ وامدان، ایسته دی کنده ساری یولا دوشه توکانچیلاردان بیری دئدی اوغول گئجه دیر قال صابا گئده رسن.

ائیواز دئدی: عمی گئدیرم گئجه نی ظولم آباددا قالام، صابا اوردان تئز گئده رم

ائیواز یول باشلادی بیر آز گئدمیشدی گؤردو بیری گلیر یئتیشدیلر دئدی من بولدوزئر سوروجوسویم یول باسیلیب چوخ چالیشدیم قالانی قالدی سحره سن گل قایید صابا گله رسن.

ائیواز دئدی بو کنده گئدیب گئجه نی اوردا قاللام.

راننده دئدی: ائله ده تئز گئد قاباق دا یاواش-یاواش کولک قوپوردو

ائیواز یول گئتدی دا آز قالمیشدی ائله اون ییرمی دقیقه یه یئتیره ردی آخی او بولارا چوخ گلمیشدی بیلیردی او قاباقکی دؤنگه نی آشیرسا یئتیشیبدیر. آمما قاباقدان کولگین باسماغین دا آنلادی چوخ چیرپیندی تئز دؤنگه نی آشسین آمما کولک اونو بورودو و دئمه ک او ائله بیلیردی دوز یولون گئدیر ایندی آشار آمما گؤز-گؤزو گؤرموردو چوخ چالیشدی باش قوتارانمادی تزه یادینا دوشدو آتالارین بورا دئدیگلری سؤز ائله آز گئدیردی چوخ گئدیریدی هر یئر آغ آپپاق بیر دوزودور و یالنیز هرده ن بیر قارالتی گؤروردو ائله کی آدامدیر و یا دام گئدیر گؤروردو سیویرقویروغودور، کولدور یاواش-یاواش اولاردان گؤزده ن ایتدیلر.ائیواز نایمید اولوب اؤزون وئردی بیر کور قارین قاباغینا سویوق و آجلیق بیر یاندان دولانماغدان بیر یاندان اونو ایاغدان سالمیشدی. ائله بوردا اؤلوم یادینا دوشدو و بو کی بو قاردا قویلانیب قالاجئک نه ایززاه ائدیردی بو فیکری باشیندان چیخاردا ائله آرتیخ قورخوردو ایندی جاناوار گلسه نه ائدیم و سویوق دان نه ائدیم و مین بوجور قورخولو دوشونلر

بیردن اؤزونه گلیب دئدی ائیواز سن بیر ایگید نده ن قورخورسان قوردا شالون وار قار اوسته چکه رسن ائله بابا بوجور دئمیشدی آجلیقدا بیر زاد دگیل شیرنی واریم گره ک سویوغونان چالیشام و اوجا اؤز-اؤزونه دئدی باشارسام هئچ شیرنی ده یئمه رم اونو باجیما آپاراجام

کولک بیر قیرپیمجا دا بوشلایاندا دگیل دی و ائیواز ائله بو فکیرلرده بیردن قول قانادینین کئی مه سینی قاندی ادله قوخدور آز قالدی هوشده ن گئده آمما اؤزون بیر ییغیب، گینه هده له دی یادیندادیر بئش ایل بوندان قاباق پاییزین سون گونلری گئجه چؤلده بیر کاپشن له قالدین. ایندی ده دؤز بیرده یادینا دوشدو آناسینا باجی سینا سووغات بیر آز پارچا آلیب تئز اولاری چیخاردیب اؤزونه بوکدو "نئی لر پارچادی سورا یویارلار" دئدی

آجلیقدا آرتمادان شیرنی نی ساکدان چیخاردیب بیرین تیخه نه-تیخه نه یئدی آخی بولاری ائوه آلمیشام باجیما آناما و بایرامیمیزا. ساکین بوشون قیچلرینه بوکدو شیرنی دن بیرین ده یئییب قالانین قوتوسویلا قوجاغینا باسدی، "دا یئمه ره م" دئدی

آز چوخ ائیوازی یوخو بورودو سویوق ایچینه دولموشدو بیرده ن آینیییب، دا اؤزون ده حرکت گؤرمه دی و بوردا اؤلوم دویغوسو اونون ایچین قاپسادی اؤلومو گؤزونه ن گؤردو ال آپاردی بیر شیرنی یییه آمما ائله دیش باتیردی اونو قوپاردانمادی، شیرنی ایکی بؤلونوب یئره دوشدو. یئل قار باسیردی او الین قوزادی قار توپونون قاباغینا نده ن بیلمیردی. آنجاق گؤردو گؤیده کی تک اولدوز سوزدو باتدی و ...

یاز باشلادی کندیده ائیوازدان خبر اولمادی اونا دئدی لر بونا دئدی لر کیم نه بیلسین؟ هره بیر سؤز دئدی:

"اولمایا مرخصلیک وئرمه ییبلر، آخی بایرامدا هله هله مرخصلیک وئرمه زلر"

"اولوکی قالیب ائله یای دا گله" ...

یازدان اون گئدیردی احد آغا بیزیم کنده گلمیشدی دئییردی اوغلوم گله جئکدیر گلمه ییب بیلمیره م نده ن هره گینه بیر سؤز دئییردی دئمه ک او زامان ایندیکی دگیل دیر تلفون ... یوخودور

اویاننان – بویاننان خبر گلدی بؤیوک چیلله نین سونون دا بیر سرباز قره آغاجدا گؤرونوب او کندلره گئدیرمیش آمما هئچ کیم اونو تانیماییب، احد آغا دئییردی منیم اوغلوم قراریدی بایرامدا گله او چاغ گلمه ز اؤزو دئییردی.

گون لر سوووشدو و اونون گلمه مه گی قورخو یاراتدی دؤیره ده ن باشاران اویان- بویاننان سوروشوردولار قار اریییدیر و یئر قارالیردی

ظولم آبادین چوبانی او گون تله سیک ائودن چیخدی اؤزونه اودون زاد آپارمادی آخی یئرین یاش اولدوغونا گؤره اولار ائودن اودون آپاریردیلار. ناهار چایی قویماغا اودون گزیردی قورو اولماق اوچون سیویرقویروغو گزیردی بیردن بیر چالادا قاردان چیخمه بیر یئکه سین گؤردو دئدی یاخچی ائله بو قاینادار یاواش-یاواش قاباغ گئتدی. گئتدیکجه اونا سهم اوتوروردو یئتشه نده بیر ال گؤردو و یالنیز قیشخیردی آغلادی آخی اودا بیلیردی ائیواز گلمه ییب

من بیلمه دیم نجور آتاسینا آناسینا باجی قارداشینا خبر وئردیلر آنجاق اوندا گؤردوک آتدی دایانیب حاجی عمی نین قاپیسیندا و اونو ناماز قیلماغا آپاریر به قارداش نه اولوب کیم اؤلوب؟

گله ن دیلی توتار-توتماز دئدی: ائیواز

و کند قاریشدی هامی یول باشلادی طالیبا، وای نه خبریدی قیمامت اولوب بو کندیده هامی آغلاییردی قره آغاجدان گله ن کیم و کند لر ده هئچ هامی گلیب ائله بیل ایندی دونیا پوزولار و نه آغلاییردی غلامحیدر و نه آغلاییردی آناسی باجی سی آمما دییه سن آتاسی اینانمامیشدی بو منیم اوغلومدور؟ یوخ یوخ

گلدیلر یویالار اولمادی بدن چورویوب آیریلیر ال آتاندا قوپور و بوندایدی ملت بیردن آغلاشدی هامی حتی اولارکی اؤزلرین بی ساخلامیشدیلار، پاسگاهین سربازلاری و رئیسی  و ...

بوردا حاجی عمی آغلار سسله دی بوشلایین ال وورمایین تیمم ائدین و بو لاپ چیغیرتدی بیزی و نه یئکه نیسگیل باجی سی او یئرده ن ییغیله ن شیرنی لری و پارچالاری الینده توتوب قارداش وای دییه ره ک آغلاییردی و آناسی چوخ آغلامادان تابدان دوشموشدو

کفن ائدیب مافایا قویدولار ایسته دیلر گؤتوره لر آتاسی غش ائله دی ائله بیل تزه ایناندی، جنازه نی یئره قویدولار آتانی هوشه گتیردیلر سورا گینه گؤتوردولر کیچیک قارداشی گلدی دوشدو مافا قاباغینا بیر ایش لر گؤردو کی ملت قان آغلادی، وای اوشاق هوش ده نده گئتمیشدی گینه قارداش آدی دیلده ن دوشموردو.و هوشه گلدی نه لر دئدی...

آغلاماق قویمور... شاد اولا روحو فاتحه اوخویاک.