پیر بولاغی و صولة السلطنه

بو کی پیر بولاغی ندیر و هاردادیر اونا گؤره کامیل دانیشاجاق آمما صولة السلطنه کیمدیر؟ و هاردا و هاچاغ اولوب ائله اطلاعات الده دگیل من چالیشیرام بو شخصیته گؤره بیر آز معلومات اله گتیره م آنجاق ایندییه دک یالنیز بولاری تاپدیم: او سریک-پئیک والیسی و خانی ایمیش قاجارین سون ایلله رینده و رضا پالانی نین ایلکی ایلله رینده بیر چوخ ماحالا خانی ایمیش دئمه ک خانلار خانی ایمیش او مانیشان و چاراویماغین چوخ پایینا صاحاتی ایمیش و بولاردا اولان خانلار هامیسی اونا مطیع ایمیش لر و قالان ملک لر ده واریمیش من اله گتیره نمه دیم.

بایرامدا بوتون کندلرده ن آق ساققال لار اؤز خانلارینان سووغات الده اونون گؤروشونه گئده رمیش لر، بیر یول کندیمیزده بیر قوجا دئییردی (من اوشاغیدیم و ایندی او آللاه رحمه تینه گئدیب) بیر ایل قیش چوخ یامان اولدو اوت علفیمیز قوتولدو شوش (کندیمیزده داغ آدی دیر) بؤیرونده مناجاتا چیخدیک آغلاییب آللاه یالواردیک قیشی قوتارسین مال-داواریمیز آجیننان قیریلدی، سونرا داغدان ائندیک گلدیک صولا سلطنه نین سووغاتین ییغیب قاری یارا-یارا اؤزوموزو سریک-پئیکده خانلار خانی نین اوتوراجاغینا یئتیردیک بیزه چوخ حورمت ائدیب او چاغدا گئدمه گیمیزین نده نین سوردو، دئدیک سووغات لاری آلیب دئدی گئدین بایرام توتون گلدیک بایرام ائتدیک هله قیشده ن 20 گون دن چوخ قالیردی، هاوا آچدی و داواریمیز اوتلاماغا کؤیشه نه گئتدی.

اوجورکی ائشیت میشیک مردومو چوخ عزیز توتاردی و خانلارا ظولم اجازه سین وئرمه زدی، و چوخ وارلی و طمطراق لی ایدی ائله کی اوغلونون تویونا رضاپالانی نی دا چاغیریر امما او دئییر گلمیره م و گیزلین شکیلده گلیر و اونون طمطراغین و وار مالین گؤره نده دئییر بو قاجار باراتاسی دی و اولاردان قالان گره ک عزل ائده م تهرانا قاییدیر و اونو عزل ائدیر وار یوخون مصادره ائدیر، بوننان سورا خان ائله اوردا یاشاییرمیش و یالنیز بیر نوکری یانیندا قالیر و کندیمیزین او قوجا کیشی سی دئییردی من خانی عزل اولاندان سونرا بیر گون ائششه گ اوسته و چوبوق الینده گؤردوم-چوخ چوبوق چکه ردی- سالام وئردیم جاواب آلدی آمما باش قورامادی یامان گونده ایدی نوکری ده قاباغدان گئدیردی، نئچه گونده ن سورا ائشیتدیک اولوبدور دئدی لر نوکری چوبوغونا سم قاتیب.

بابام رحمتلیک دییه ردی بابامیزین بیر عرب آتی واریمیش صولا سلطنه نین نوکرلری اونو آلیب عراقا گئدیرلر اوقده ر آتی چاپیرلار آت قاییدیب گله ن همه ن چاتداییر. آمما بیله م خان پولون وئریر.

آمما پیر بولاغی :

بیزیم قونشو کندیمیز پیرزققه (پیرسققا-پیرزاققا) کندینده کندیده ن بیر ایکی کیلو متر آرالی بیر کمر وار چوخ سیلدیریم بونوو جاریندان بیر بولاغ چیخیر کی اونا "پیر" دییه رلر، بو کند قره آغاجدان 40 کیلو متره جاق جنوب غربه آراسی وار. آمما بو بولاق عادی و همیشه لیگ بولاغ دگیل و ائله بونون عادی اولماماغی اونون "پیر" آدلانماسینا سبب اولوب ائله کی بو بولاغین گونده یالنیز دؤرد دؤنه سووو گلیر و سونرا ائله قورویور کی ائله بیل بوردا اصلا سو و بولاغ یوخوموش. و هر دؤنه یاریم ساعاتاجاق بول و سویوق سو آخیر ائله کی اوندا چوخ ال ساخلاماق اولماز. ایندییه دک بو بولاغین سببی و نده نی تاپیلماییب، تحقیق لر ده اولوب آمما دوزگون بیر دلیل تاپیلماییب.

بو بولاغین بئله اولماسی و اونون هردن آخماماسی بئله بیر اینام یارادیب کی بو بولاغ پیس آداملار اؤزونه آچیلیب و آخماز. و ایندیسه بیر توریستی یئرده اولوب دؤیره کندیلرده بئله دیر کی اورا کئده ن بیر دیری چپیش و یا آیری حئیوان آپاریب اوردا کسیب پیشیره رلر و اتین یاریسین دا شوربا ائده رلر، اوردا یئییب قالانیندا گتیریب کندیده پایلارلار.

آمما اؤز سؤزوموز:

دییه رلر بیر گون صولا سلطنه کی پیرین تعریفین ائشیدمیشدی دئییر منده اورا گئدمه ک ایسته ییره م، بیر های-هوی و طمطاراقیلا اورا گلیر آمما بولاغ آچیلمیر بیر هفته اوردا اوردو وورور بولاغ آچیلمیر آنجاق نایمید اولور و قاییدماق ایسته ییر آتینا مینیر و یوز متره جاق آرا آچیر کی نوکرلر چاغیریر آقا آقا قایید بولاق آچیلدی، صولا سلطنه دئییر: آی بالا او سیزین اوزوزا آچیلیب منیم کی یوخ اوتوران و ال ایاغیزی یوون من گئدیره م و یول باشلاییب گئدیر.