"سلطنت طلبلیک: کؤهنه پالان سؤکمهکلیک دیر، ائله اوْ پالان کی شاهێز یاغێش دا بئلینه باسدێ"
بودا معجزین جاوابی سلطنت طلب لره:
(جواب معجز شبستری به سلطنت طلبان)
جمهوریت
ساققيا بير باده وئر ابناي جمهورييته ١
تشنه دير اهل وطن صهباي جمهورييته ٢
ساکت اول ، آهسته گل ٣، تند اسمه ٤، اي باد صبا
قورخورام توز اگلشه سيماي جمهورييته ٥
بير پارا نادان کيشي" باشسێز بدن اوْلماز" دئيير
بس دئمك واقف دگيل معناي جمهورييته
قوردا وئردي گله ني ٦ چون ، کله سيز چوپانيميز
اول جهتدن دوشموشوك سئوداي جمهورييته
قامتي اولدو خميده ٧ بينوا ايرانلي نين
بس کي کرنوش ائيله دي ٨ اعداي جمهورييته ٩
قبله عالم لره ١٠ يوز ايل بلي قربان دئديك
بير زمان دا "هن" دئيه ك آقاي جمهورييته
ايسته سن قئيد اسارتدن ١١ خلاص اولماق اگر
قوي قدم موسي کيمي درياي جمهورييته
ائتدي احيا يئنگي دنيا ١٢ مرده گانين ١٣ بالتمام ١٤
سن ده يالوار ، اي اوغول ! عيساي جمهورييته ١٥
بير قاريش يئر يوخدو لم يزرع ١٦ فرنگستاندا
ائيله بير عطف نظر صحراي جمهورييته. ١٧
محتكرلر آستانين ١٨ بوس ائتدن ١٩ جهالدير، ٢٠
سورته اوز عاقل گرك طغراي جمهورييته. ٢١
قدر زر ٢٢ معجز شناسد ٢٣ ، قدر گوهر گوهري ٢٤
اولماز هر کس مشتري کالاي جمهورييته. ٢٥
******************
١ - جمهوريت اوغوللاري
٢ - جمهوريت شرابي
٣ - ياواش گل
٤ - سرعتله اسمه
٥ - جمهوريت اوزونه
٦ - سورونو
٧ - اگيلميش
٨ - باش ايدي
٩ - جمهوريت دشمن لرينه
١٠ - شاهلارا
١١ - اسيرليك زنجيريندن
١٢ - تازا دنيا. منظور آمريكا
١٣ - اؤلولرين
١٤ - تاماميله
١٥ - جمهوريت عيساسينا
١٦ - اکيلمه ميش.
١٧ - جمهوريت چؤلونه
١٨ - لازيملي شئيلرين آنبار ائدنلرينين آستاناسين
١٩ - اؤپن
٢٠ - جاهيللردير
۲۱ -
۲۲ - قيزيلين قدرين
۲۳ - معجز تانييار
۲۴ - جواهر قدريني جواهرچي
۲۵ - جمهوريت تجارت مالينا
منبع:
معجزون چاپ اولونماميش
پروفسور زهتابي نين توپلاديغي
شعرلري
**************************
جواب معجز شیستری به سلطنت طلبان
