چیلله گئجه سی
کولک چیرپیر - سویوقلوقدان تندیر سونور
کورسو ایستی- داخی وئرمیر
کیشی آرواد قوجاقلاشیر- ایستی مه گه
ایکیسی گنج - اورگ سئویر
شهوتده قاریشیر اوچو...
گوز باشلانیر - دکولک قالخیر
توز یارپاغی کنده باسیر
اوشاق سسی گلیر ائودن ...
قیش گئجه سی - گینه کولک
سازاق هاوا
کیشی آرواد ایسته دیلر قوجاقلارین
سیخیلدیلر بیر - بیرینه
بیردن اوشاق سسی قالخدی: آغلاماغا
کیشی آرواد تئز هویله سک آرالانیب
اوشاق اوسته یوگوردولر
قوجاقلاشماق اونوتدولار...
ایندیسه قانیرام
نییه ایلکی یازاندا اویره تمن
دئدی سو یازدی "آب"
اوره گیم اسدی اوندا قورخودان سوز دئمه دیم
دئدی آتا یازدی "بابا"
دئدی چوره ک یازدی "نان"
چوندی هر زاد دادی تامی
نه اینه ک وئردی سوتون گاو دئمه گه
نه بیزوو اوینادی گوساله دییه
هه بالام ایندی قانیرام نییه اولدی ائله
او یازیردی منی آلداتماق اوچون
وارلیغیم دانماق اوچون
داندیم یوردومو ساتماق اوچون
آتامی آنامی آتدیم نه یامان
و داغیلدیم ...
قوتور اولموش کئچی تک
چوللره سالدی منی
آمما اوره گ چونمه دی آلداتماییم من اوزومو
ایندیسه ده ائشیده نده آشیق اوره گیم آغ یئله دورموش بیر آغاج تک اسیری
و دانیشاندا بیری تورکجه نفسیم ترله نیری
من هله تورکم و هله سوره جم تورک آتینی
.....
ایندیده یادیما دوشنده اسیر بدنیم آی آنا
ایلکی گون اوخولدا اویره تمن نئجه دئدی سو
یازدی "آب"
ایندیده قورخورام آنا
و بیلیره م او گوننه ن کی اینک بیزه "گاو" اولدو
بایدا سوتونه ن دولمادی آنا
و بیزوو "گوساله" آدلاناننان کندیمده شادلیق قالمادی
من قوزومو "بره" دیه م اورگیمی قان آلدی
ائله او یارادی منی ایندی ایاقدان سالیب آی آنا
شعر
